北海道 2005

第十九日：吉岡海底／札幌

好喇，究竟尋日講o既”最後一個有趣o既地方”，係邊度呢？

答案就係：叮噹海底列車！








連接北海道同本州之間o既津輕海峽 線，有兩個好特別o既車站－－龍飛海底站同吉岡海底站．哩兩個車站並無對外o既出口，亦唔係就咁去得到．因為兩個車站需 要另外買”見學券”，遊客可以入去親身感受下號稱全世界最長o既海底隧道－－青函隧道（註）內部o既構造．而吉岡海底站有每年只開放六個月o既展覽館：叮噹海底世界！ 要進入叮噹海底世界，就只有乘搭哩架一日一班o既叮噹海底列車．

（註：我暫時唔知究竟青函隧道定英法隧道邊條長 D，佢地自己係咁講我就咁寫啦）

我 已經特登揀星期一先去，但係都全車滿座．成架車六個車廂都係叮噹卡車，每人送張明信片同埋一頂叮噹紙帽．用左個幾鐘先去到吉岡海底，再行多三個字左右就 去到叮噹海底世界．入面可以話係一個叮噹遊樂場，只有好少量關於青函隧道o既資料．唔好問我點解開個叮噹海底世界o係哩度，除左因為叮噹大長篇有集”海底 大冒險”之外我真係唔知有咩關係...

留o係叮噹海底世界大約八十分鐘，都係影下相同買下紀念品，三點三就行返去搭回程車返函館．原來仲有另一個觀光路線，係走青函隧道o既另一邊，仲可以睇住津輕海峽線列車經過，不過要坐另外一架車先可以參加．四點七返到函館，要五分鐘之內趕去搭札幌o既車，我上到車未坐低架車就開了．

到達札幌已經七點九．都肯定無野行得到，就去酒店 Check In 就去食飯，試下北海道出名o既”成吉思汗”，點知竟然係－－韓國燒烤！仲要唔係任食，得細細碟肉，超唔抵．相信聽日都無乜野好行．反正後日下晝就上機，聽日就o係市中心附近行下街，享受哩個長假期o既最後一日．

posted by Alan @ 7/25/2005 11:00:00 PM