第十四日：富良野
我住果間小旅館有三間房同一間小屋，今日食早餐果陣發現有兩間房係台灣人... 間餐廳剩係聽到普通話．
因為今日時間好鬆動，我都遲少少先出去坐十點班車去富良野，轉巴士去芝士工房．入面有得俾我地即刻學整牛油／芝士／雪糕，可以即刻拎走自己o既製成品（芝士要等兩個月），可惜我時間唔o岩無參加．仲有三種唔同味道，富良野特製o既芝士試食，我非常喜歡其中一種紅酒芝士，哩種芝士係用紅酒混入牛奶入面，而且發酵時間比一般芝士長一倍，要四個月．味道非常的濃，而且都唔算好貴，不過我仲有六日先返黎買唔到... 希望o係札幌見得到．
芝士工房介紹左幾間比較特別o既芝士料理，我返去市中心之後去左其中一間，試左都幾出名o既芝士拉麵．個麵一黎我就兩眼發光，上面幾塊芝士就係紅酒芝士！ 因為芝士會溶o係熱湯，需要特別o既食法：幾塊芝士放o係麵同野菜上面，逐少放入湯入面，將半溶o既芝士同麵或者野菜一齊食．
之後搭登山纜車上富良野山，諗住行條比較易行o既路落山，點知突然落雨... 本來想試下照行，但係行左一半見到山路邊o既樹有 D 跌低左，好難認路，加上睇登山冊都有人話上唔到，都係放棄，直接坐返吊車落山．落山之後雖然雨細左好多，不過相信都唔會易行得去邊，因為個地下已經好似漿糊咁．
想去果間餐廳休息，唯有返去美瑛先食野．去到一間叫”樹木的好朋友”o既餐廳，入面裝修得好似一間小樹屋，擺左好 多小裝飾，食物本身亦好好，大部份都係用 附近農場o既農產品，無加好多醬汁，但係味道配合得非常好．缺點係遠少少，我由車站行去行左五個字．經過哩間食店o既巴士一日得三架...聽日就要離開美瑛，去另外一個完全唔同但係有另一種美o既地方－－小樽．
posted by Alan @ 7/20/2005 10:00:00 PM
0 Comments:
Post a Comment
<< Home