第十七日：函館
又係差少少起唔倒身，要趕 10:04 架火車，10:01 先去得到車站．反正函館要行o既野不多，要慢慢來了．
去得到函館都兩點幾， 哩度有好似我地電車咁o既系統，仲方便過巴士，尤其是我哩兩個禮拜都要對住個時間表做人，突然有架幾分鐘就有o既車，真係有 D 唔慣．去酒店搞下哩樣果樣，已經三點有多，連飯都未食... 行左大半個鐘都搵唔倒間開o既食店（下晝休息），唯有食便利店野頂住先．五點就出發去函館山，睇所謂世界三大夜景之一．
坐吊車上到去，多人得好離譜，好彩我叫做早上黎，仲有時間影下日落，之後僅僅霸到位對住函館市中心．睇住個天黑，街上面o既燈慢慢著，的確係幾靚，不過因為見慣香港夜景，都唔係好大驚喜，因為哩度見到o既燈都係街燈，對比香港係寡左少少．
到八點落山，程吊車好有心思，為左俾人欣賞夜景連燈都熄埋．去左間叫 The Very Very Beast o既店食野，哩間其實係間酒吧，本來最出名係佢o既肉湯，係用牛肉連續餚三日，不過今日賣晒... 試左個奄列飯，飯係用茄汁同牛肉炒，同佢個汁好夾，如果聽日諗唔到食乜就再去多次．大家黎到都一定要試一下．
posted by Alan @ 7/23/2005 11:00:00 PM
0 Comments:
Post a Comment
<< Home