北海道 2005

第十五日：小樽

因為擺左個小烏龍，o係帶廣時唔記得買左張五日乘車證先，原來富良野同美瑛都買唔到，所以今次要先坐車去旭川，先買左張車票，再經札幌去小樽．好彩本來我已經係要咁行，因為美瑛去旭川只要半個鐘，而旭川去札幌一個鐘有一兩架車，比經富良野返去好好多．

食完早餐之後，旅館主人車我出車站，沿途傾下香港o既生活，原來佢本來都係東京人，因為覺得東京生活太急，走到上去北海道開哩間旅館同陶藝展覽室．告別美瑛之後，好快就去左旭川買五日火車證，搭車去札幌再轉車去小樽．



十二點幾去到小樽，去到酒店又未有得 Check In，唯有放低個袋周圍行．小樽係一個非常歐陸o既城市，尤其是近住運河o既區域，有好多文物級o既建築，我住o既酒店就係其中之一，o係運河附近，舊北海道拓植銀行大樓入面，當然入面改裝過好新淨．







雖然小樽運河係夜景比較靚，既然就o係附近當然要去望下先．條河比我想像中短，可能係重建過截短左好多．倉庫已經全部變晒小商店同食館，我見到其中一間食店十周年有特別 menu，就去左入面食，水準非常好，而因為果度之前係酒廠，有幾種特別o既啤酒．我試左一種比較少見的麥酒，叫 Weizenbock，比普通的甜同易入口．

之後漫無目的地行，睇左一系列o既硝子（玻璃）店，無疑係做得好靚，但係貴得好緊要，會有幾多人用三百蚊港紙去買一個靚到唔捨得用o既煙灰缸？我一路行都要一路小心唔好撞跌架上 D 野，唔係掃跌一排都唔知點算... 本來有 D 小飾物可以買返黎送俾人，但係太易爛，算了．


行到非常累，因為之前幾日都幾趕，三點正就返去 Check In，o係酒店休息到五點幾先出去．行左陣街再食埋飯，差不多夠鐘去影夜晚o既運河．好多人帶左腳架o係度等，我就因為要行十幾廿日，點都無可能帶住個腳架周圍行，唯有放o係石壆影．好彩都有幾張影得唔錯．影左半個鐘，就返去休息了．聽日都會係隨心咁行下抖下，當休兩日息．

posted by Alan @ 7/21/2005 11:00:00 PM