北海道 2005

第十三日：美瑛／中富良野

哩間小旅館係包早餐的．一落到去嚇左一跳，個早餐o既份量... 炒蛋，橄欖油野菜一大碟，大半磅小麥麵包，果汁，紅茶！最驚嚇係個包，不過因為佢地係全部用附近農家新鮮送到o既材料，全部都好新鮮好好食，我食晒全部用左 45 分鐘！飽到到下晝都無乜再想食野．

我張火車票包左兩程免費觀光巴士，因為去o既地方連巴士都無得去，我就用一個朝早坐晒兩程．去o既地方有幾個山丘，同一個叫拓真館o既相片館．美瑛o既山丘好靚，而且全部都係農地，除左種稻米之外佢地仲有種蕃薯薯仔，其中一架車就有經過卡樂 B o既薯仔工場；當然唔少得北海道最出名o既花，不過我完全唔記得去過o既山丘名了．

下一班觀光車係去拓真館，同埋另外幾個離美瑛比較遠o既景點．拓真館係一個攝影師o係日本周遊二十年黎o既攝影展，全部都係風景照，最多o既就係北海道．坦白講，九成都已經做左明信片，真係唔覺有乜好行... 反而下一站－－四季彩之丘就最有睇頭．唔知佢地用咩方法，o係哩個山丘上面種晒北海道四季o既花（唔係冷房／溫室，係就咁露天種），一行行咁排好晒，好有心思．觀光巴士停半個鐘，但係只係僅僅夠我遊左一個圈！

抖左一陣，一點鐘就上ノロッコ列車去中富良野o既薰衣草花田．點知臨上車竟然落大雨！好彩落車前雨就停左．我只係去左最大o既富田農場，大家平時見到富良野o既薰衣草田相片，全部都係o係哩個農場影出黎．入面除左好多片好大o既薰衣草花田之外，仲有同頭先四季彩之丘一樣o既彩色花田．真係好多中國／台灣遊 客，我o係農場入面聽到o既說話，平均十句有六句係普通話，三句係廣東話，一句係日文．

一路都有斷斷續續落雨，我都乘機o係落雨時食左餐非常非常好食o既下午茶．佢地賣o既全部都係當地農產製品，我食左個好好好好食o既芝士熱狗（我敢講係我黎到日本最好食o既野．比豚丼更好食），即採花蜜o既布甸，同埋無加水無加冰o既鮮榨哈密瓜汁！當然好貴，尤其是杯哈密瓜汁，不過如果大家有機會黎，豪一 次都要食下（特別係個熱狗！）

返轉頭時，行到一半先落大雨，我去到車站已經全身濕晒，該死的架車黎之前五分鐘竟然停晒雨仲要出太陽果隻．無乜特別野想行就去富良野市中心，獵鷹射球同雪崩攻擊o既發源地（逃）．搵左”北海道中心地標”，仲有影埋富良野小學同富良野高中（足球小將呃人o既，都無人踢波！），差不多夠鐘返去搭車，點知中途又落大雨，再一次變落湯雞...

返到美瑛都無乜心機食野，買左個包就算，聽日究竟做乜好呢？

posted by Alan @ 7/19/2005 10:00:00 PM