北海道 2005

第十二日：美瑛

原本諗住搭十點十三分o既火車去富良野，不過朝早出現左少少意外，坐唔到架車．下一架要一點先開，仲要接住由富良野去美瑛架係慢車，去到美瑛會係五點半，今日就咁浪費了．

十一點 Check Out，帶廣又無地方好去，又係去食豚丼．間”元祖”朝早十一點已經排長龍，又落雨，唯有去另外一間試炭燒的（相信各位睇左三日都會發現，o係帶廣食豚丼o既舖頭密過香港o既 7-11，係梗有三四間o係左近！）．之後又係周圍行，試食下唔同特產睇下遲 D 買咩返黎好，到十二點九上去月台等車．因為唔知係單卡短車，我企個位又睇唔到架車黎，我爭 D 又上唔到車！！

兩個幾鐘頭車程都係睇下書訓下覺咁，無咩好睇，三點半去到富良野，等四點二架ノロッコ列車（同濕原果架一樣），因為有上次o既經驗，都係唔好周圍去早半個鐘o係月台等上車，因為人一多真係連位都無．點知今次好少人，真奇怪，照計睇薰衣草o既人點都應該多過果個咁鬼偏僻o既濕原...


哩架ノロッコ列車真係全程都慢行，經過左幾個薰衣草田，不過我今日都係唔落車睇住．成個鐘先到美瑛（平時車半個鐘就到）．美瑛有個特點，就係 D 舖頭全部都係起o係自己屋企下面，同埋o係間屋上面會寫住自己舖頭係邊年開業．



搭的士去住果間小旅館（揹住個袋好難行 2km，我計過唔會好貴先搭），到左之後有少少覺得後悔，雖然入面係好靚，間間房都好新，不過係無冷氣的... 就算話係北海道都好，美瑛下晝都有三十度．不過其他地方都好滿意，雖然無獨立浴室，不過唔係大浴場而係有兩個公用花灑房，衛生亦非常好．

之後行返出去美瑛市中心行，靚得黎唔叫好多野睇，好快就行完了．睇黎聽日搭完觀光巴士，都可以直接去富良野．

posted by Alan @ 7/18/2005 10:00:00 PM