北海道 2005

第十八日：函館

我住果度好近五稜郭，自然地今日第一站就去了．五稜郭係幕末時期，德川幕府最後一批逃出黎o既家臣聯同新撰組土方歲三一隊，一齊退到北海道函館，o係呢度抵抗新明治政府o既最後防線．星型設計減少了死角，而且可以組成十字式防衛網互相支援，世界好多堡壘式城市都有相同設計．而要欣賞五稜郭美觀外型就要上隔離o既展現台，下年四月會有另一個高兩倍o既展望台建成，可惜我今次見唔到了．

展望台入面有好多相關人物o既資料，最受歡迎係有個等身大土方歲三銅像，好多人走去合照．地下賣店完全係新撰組專門店，除左大量 T-Shirt 同小飾物之外，比較少見o既羽織同門布都有，不過價錢不平就是了．








食完晏入五稜郭行下，五稜閣已經變成一個大公園，有大空地俾人租黎表演，無再留返以前o既建築物，只有個唔係好多野睇o既展覽館．不過可見到佢地進行緊一個工程，係按照最近發掘出黎o既資料重建以前o係五稜郭正中間o既箱館奉行所．到時應該會多 D 野睇．


之後就買一日乘車證遊電車河，去左幾個地方但係都唔係好特別，因為多數都係箱館戰爭o既遺跡同紀念碑，例如土方歲三戰死o既地方，幕府軍紀念碑等，叫做最靚就係函館市最南方o既立待岬，可以望到隔開本州同北海道o既津輕海峽，睇左幾日城市再睇返個一望無際o既海都幾舒服．夜晚又係返尋晚間餐廳，試佢另一種汁o既奄列飯．

聽日去埋”最後一個有趣o既地方”，就會返札幌，不過其實札幌都無乜野想行．

posted by Alan @ 7/24/2005 11:00:00 PM