北海道 2005

第十六日：小樽

差少少起唔到身食早餐，趕到最後十幾分鐘先去到餐廳，行左十五日，真係有 D 開始累了，開始好難起身．

食完上返房休息一陣，去行冷門少少o既野，上去一條叫”地獄坂”o既斜坡行下．地獄坂都算幾斜，不過最辛苦都係條行人路凹凸不平，加上天氣真係好熱，行左四五個字已經周身大汗．差不多上到斜坡頂，轉入去樹林去旭展望台，由展望台可以睇到成個小樽市，同一條好靚o既海岸線．


落返去去左間意大利餐廳食意粉，之後落山返去市中心，沿途見到間富岡教堂，成條地獄坂其實好多教會，不過天主教教堂就得哩一個．建築同平時o係香港見到o既有 D 唔同，上面個大 PX 標誌我記得睇過書係比較舊o既標誌，不過我要返香港先可以確認．

(補記：個標誌係 Cross of Constantine)





行經前日本銀行，現在係金融展覽館，見免費又入去睇下，展覽本身講o既係明治時代開始日本貨幣制度制定同改革，最特別係佢開左個大夾萬，俾人睇下央行儲新錢幣o既地方，仲有一大舊佢聲稱係一萬張一萬円，即係總值一億円o既紙幣俾人試下幾重！我試過，唔係好重，只有十公斤，仲輕過我個袋....

反正經過酒店，返上去休息左半個鐘，之後行 去小樽交通博物館．入面主要係展示已經停用o既舊火車，同埋北海道鐵路歷史．火車本身我無乜興趣，我想睇o既係舊鐵路資料，因為o係北海道真係周圍都見到已經唔用o既鐵路遺跡．北海道開拓初期，因為資源豐富但係唔集中，十九世紀後期開始係不斷地建鐵路．甚至由稚內附近o既幌內（電影”鐵道員”就係講哩度）運煤到小樽．其中有 D 幾有趣，例如有好多條森林鐵路（已經全部停用），車身主要係木造的．



行完交通博物館已經五點半，出到去剛剛好係遊覽巴士到站o既時間，就上車遊小樽市一個圈．架巴士甚至去到兩個 JR 站以外o既小樽築港，最後又返到我酒店果頭，就咁睇下成個小樽市就最好．落車後去左一間開左好多年o既西餐廳，但係真係好難搵（見圖）... 佢做法好特別．我叫果個意粉係用肉餚出好濃o既肉湯出黎，淋o係意粉上面食．好好食仲要唔貴（750 円），係我近幾日最平o既一餐．有機會要再試一次．




小樽的確好有風味，不過因為我已經行左北海道好多日，好多靚建築靚景，並無我想像中咁大驚喜．加上哩度應該適合冬天黎，今次係有少少失望．聽日去函館，重點有五稜郭，新撰組，某笨蛋搞錯左o既世界三大夜景（詳見第一日 Comment），我o既行程亦接近尾聲了．

posted by Alan @ 7/22/2005 11:00:00 PM