北海道 2005

第十一日：帶廣

今朝想休息一下，成十一點先出門口．原祖豚丼のぱんちょう比尋日多一倍人排隊，都係去第二度食算．行到去一條叫北之屋台o既小巷，但係又得兩三間開左．最後去左另一間野度食豚丼，呢間似乎都係幾出名o既店，入面賣o既都係比較高價o既日式菜（不過原來豚丼比天婦羅丼更貴），最初入口就覺得味道好濃，飯汁味道非常好，但係食到最後兩舊肉就覺得好滯，始終都係原祖做得比較好，肉同飯o既味道比較平衡．

食完就o係街行下，去左六花亭同柳月本店．六花亭本店入面主要係賣蛋糕，同埋有免費咖啡．o係其他地方見倒o既北海道特產銘果，哩度只係佔少部份．柳月就有好多其他地方較少見o既特產，但係全部都唔擺得好耐，睇黎都係去到札幌買"三方六"算．


之後都係無目的咁周圍行，去到十勝／帶廣地區o既命脈－－十勝川，有條好似汀九橋o既吊橋，下面條河水幾清，我到達帶廣之前o係火車都見到有幾個小朋友o係下游玩水．行返轉頭見倒有唔知乜學校o既巡遊，再經過左幾個花園，最後行左半個鐘去城市另一面o既綠ヶ丘公園．

綠ヶ丘公園好大，由一邊行去另外一邊要差不多半個鐘，入面有幾個美術館同紀念館，不過我無興趣所以一個都無入．其中一個角落，大約係成個公園o既五份之一左右，係一塊大草地，有張四百米長o既長木凳！有個小型高爾夫球場，好多公公婆婆o係度打高爾夫球．成個公園一個垃圾桶都無，但係好少見倒垃圾，全部人都 將自己 D 垃圾帶走．

行到五點幾返酒店，因為哩幾日只係買野食同飲品，慳左好多錢，俾自己豪一餐，去酒店餐廳食只有假期先出o既”十勝牛扒任食”，每碟都由兩大塊，我就食左三碟，乜都夠皮了！

聽日就出發去富良野，我會住o係附近o既美瑛，不過三晚都無得上網，下次 update 會係 21 號星期四．

posted by Alan @ 7/17/2005 11:00:00 PM